Våronn

Her er det den 5 m lange kanten med Marikåpe (Alchemilla) som får vårklippet sitt.

No har våronna starta her hos meg og. Eg er så heldig at eg har yngstedattera heime eit par veker som har tilbytt seg å hjelpe til med våronna i hagen og det vart eg svært glad for.
Med meg vert det for det meste "puslerier".
På onsdag fekk eg shina opp fjellhagen så no ser den nokså bra ut og eg trur det meste har overlevd vinteren der og. Den har jo hatt ekstra godt snødekke ettersom det er der all snøen hamnar som må måkast vekk frå vegen inn til huset.

Pionane er i full vekst og alle saman har klart seg fint denne vinteren. I tillegg til flotte spirar fant eg ein god del pionfrø i bedet då eg reinska der og dei var tekne vare på og skal såast, stratifiseringa her dei jo allereide fått på naturleg vis.

Den Ungarske blåveisen ( Hepatica transsilvanica) er i full blomst. Denne sorten heiter 'Weinreich Blaue' og er ein flott sort.
Eg har også "systersorten" 'Weinreich Weize' som er reint kvit.

Her er det vanleg norsk blåveis Hepatica nobilis som blomstrar flott.
Plana er at eg denne våren skal omarbeide eit av beda mine under det øverste morelltreet til blåveisbed.......


Det er krokusane som dominerer blomstringa i hagen no og dei har eg i mange variantar. Eg har planta dei både i plen, bed og fjellhagen og bak huset har dei fått sådd seg fritt ettersom slåtten der vert teken med ljå og krokusfrøa rekk å bli modent før eg tek slåtten.

I fjellhagen eignar små krokusgrupper seg godt syns eg, men helst dei botaniske artane. Dei foredla sortane vert litt for dominerande syns eg.




Eg reiknar med at det må til fleire slike økter som vi hadde i går for å komme i land med våronna i hagen, men med god hjelp skal det nok gå bra. I dag er det andre ting som står på programmet for Silje sin del, men eg skal ta meg ei runde og fullføre den delen vi begynnte på i går.

I morgon skal eg til Eid og delta på Hyperturfakurs i hagelaget sin regi og det vert interessant - Dette er eit kurs eg i mange år har hatt lyst å delta på etter å ha lest ein artikkel om det i Norsk Hagetidende for mange år sidan. Bilder og referat derfrå vil eg komme tilbake med.

Også billene har starta våronna...... nye generasjonar må til der og om livet skal gå vidare.

Idag er det 9. april og i den samnheng går nokre av tankane mine 70 år attende i tida og det som hende 9. april 1940. Eg og min generasjon som ikkje opplevde krigen kan nok ikkje sette oss inn i korleis det var å oppleve at landet vart okkupert, og framande makter overtok styringa.
Vi har enormt mykje å takke dei som kjempa imot og gav liva sine for eit fritt land i dei 5 åra landet var okkupert og på framande hender.

Tilslutt vil eg gjere merksam på at eg har "innstallert" eit oversettingsprogram i bloggen min så mine utanlandske venner og gjestar kan få med seg det meste av det eg skriv og.
Det var artig å sjå at det tok ikkje lang tid før der var registrert utanlandske gjestar på flag counteren min som eg også "innstallerte" i går.
Takk for god assistanse til den som hjelpte meg med koder og veiledning til begge deler! :)


Ha ei fin helg alle og nyt vårteikna, vårlufta og fuglesongen.

Påskedag 2010

Eg håpar at dette biletet av bygda sitt eige "påskegg" -Gullskora -vert det siste vinterbiletet denne sesongen!
Sjeldan å sjå fjorden så blank som ein spegel, men det var det den dagen (30.mars) då madammen tok dette biletet frå varandaen vår.

Påskeliljene rakk ikkje å bli ferdige til påska dette året, men om ikkje lenge har eg mange flotte gule tuer rund om i hagen.


I dag har eg vore ute og reinska litt i fjellhagen og bed, men det var ikkje så lange stunda før eg måtte gje meg og gå i hus att - energien er ikkje på topp nei, men eit innlegg i bloggen vart det jo i pausa..... så får eg sjå om det vert ei økt til seinare idag.
Har fått yngstedattera heim på besøk og ho skal være her eit par veker så eg får spørje pent om litt bistand så eg får gjort det grøvste før veksten kjem igang for alvor ! ;-)

Helleborus niger - den reint kvite julerosa er fullt utsprotten no. Vakker!

Blåveisane er også såvidt begynnt å sprette ut. Det ser ut til at alle har overlevd vinteren og det er kjekt ettersom eg i fjor skaffa meg fleire nye sortar både av den vi har viltvoksane her i landet Hepatica nobilis og ungarsk blåveis H. transsilvanica. Knoppane er klar under snøkåpa og så snart snøen er vekk foldar dei seg ut mot sola og lyset. - Vårteikn betre enn noko anna!

Her ser vi knoppar på Hepatica transsilvanica 'Weinreich Weize' - på biletet under er det også ein ungarsk blåveis H. transsilvanica 'Weinreich Blaue'


Her er det Hepatica nobilis marmorata - ein blåveis eg importerte frå Tyskland i fjor som skulle ha sølvmarmorerte blad, men det har den lite av så det spørs om ikkje det er ein feilmerka plante eg har fått!!!! - Iallefall er blomsterknoppane velfyllte og sprettande klar til å opne seg mot verda.

Krokusgruppene lyser mot meg mange stadar i hagen - dette trur eg er C. tomasianus som eg har grupper av fleire stadar.


Under sommarfuglbusken (Buddleja) har eg planta grupper av forskjellige krokusar som lyser opp. Her har småfuglane hatt mellomlanding med solsikkefrø i vinter så det ligg betydelege mengder med solsikkeskal på bakken. Litt beskjæring trengst og iløpet av våren.

Enkelte av Auriklane mine ute og har begynt å vise knopp. Eg gled meg til dei kjem i blomst, håpar at mange av dei sjølvsådde kjem i blomst i år med mange nye fargevariantar.

Kuleprimulane viser og knoppar og begynnande farge.


Tilslutt vil eg vise den flotte barken på snøklokkebuska mi - Halesia carolinae - det er ikkje bare "snøklokkeblomstane" på den busken som er tiltalande.

I går på påskeafta hadde vi eit strålande pent veir med sol og bra temperatur som lokka fram både den fyrste humla og den fyrste sommarfuglen dette året.
Kjekke vårteikn!
Idag er det overskya og søraust bris. Det ser ikkje ut til at det skal bli meir sol idag enn dei små og få glytta vi fekk i morgontimane, men det er bra temperatur så vi er fornøgde bare det er opphald.

Tilslutt vil eg ynskje alle ei fortsatt god påske!

Vårteikn

Crocus chrysanthus 'Saturnus' er ein av dei flottaste krokusane og aller finast er den i knopp syns eg! - Godt å komme heim att å finne slike vårteikn!

Madammen og eg har vore 5-6 dagar i Valdres på besøk hos eldste datter med familie.
Dei har kjøpt seg hus som dei flytta inn i på nyåret og det var kjekt å sjå korleis dei har fått det i den nye heimen sin. Sander syntes det var kjekt å få besøk av Besta og Besten.
Ein aktiv krabat med mange jern i ilden som det høver seg ein gut på snart 2 år.
Vi har jamn kontakt på skype, men det vert sjølvsagt ikkje det same som personleg og nær kontakt med barnebarna.
Laurdag var eg på spabehandling på Beitostølen som eg fekk i gebursdagsgåve tidlegare i vinter og det var ein nytelse.
Igår (mandag) kom vi heimatt og det var godt å sjå at snøen hadde minka frå 77 cm då vi drog til 22 cm idag tidleg på den faste målestaden. Enkelte snøfrie bøter er det og her og der.

Eg syns det var stas at buskbomhekken min hadde dukka fram att frå djupsnøen, det går på fram! I bakrgrunnen skimtar vi eit av dei store morelltrea våre og under der det skal det omarbeidast til blåveisbed er tanken - om det vert til våren er enno uvisst.
Eg måtte bort å sjå om det var liv i blåveisane som alt har fått plassen der og det var det heldigvis i alle saman.

Under steinbenken ved morelltreet hadde eg gøymt tre potter med Hepatica - ein H. japonica frå Japan, ein H. henryii frå Kina og ein H. asiatica frå Korea godt innpakka i tørt lauv og granbar. Dei levde alle saman i beste velgåande. Den eine av dei jamvel nesten i blomst under der.

Påskeliljene er sprutfulle av kraft og er klar til blomstring straks dei er kvitt snødekket, med litt varme i veiret er det ikkje lang tid før den fyrste blomsten openbarar seg.

Snøklokkene blomstrar forskjellige plassar i hagen der det er fritt for snø, her representert ved den fylte utgåva eg har Galantus nivalis 'Flore plena'.

Den eine blåveisen som har lege i dvale, innpakka i tørt lauv og granbar under steinbenken har alt klar knoppar som snart vil sprette ut. Dette er ein japansk blåveis (H. nobilis var. japonica)

Julerosene med store knoppar. Her er det den gulkvite Helleborus orientalis 'Yellow Lady......og nedanfor er det H. atropurpurea som snart er i blomst.


Her er ein krokus som eg ikkje kjem ihug namnet på (namnelappen ligg under snødekke) som pressar seg gjennom bladverket til Tiarella grandiflora.

Den fyrste Primulaen i blomst etter denne merkverdige vinteren er P. pruhonichiana som hadde ein open blomst bare eit par dagar etter at snøen gjekk på den plassen den står.
Ellers er det mange Primula i knopp, men ingen andre som blømer akkurat no.
Tidlegare år har eg hatt Primula i blomst heile vinteren unntatt dei få dagne det har vore snødekke.
No har vi hatt konstant snødekke sidan 19. desember så det er temmelig uvanleg for oss dette.
Håpar bare at ikkje det kjem meir snø heretter, no vil vi ha VÅR!

Meir snø og nye showauriklar i blomst

Dette bildet er ikkje frå idag, men det siste døgnet har vi fått nye 25 cm snø og har no 67 cm. Det fortsette å snø så vinteren er absolutt ikkje over enno sjølv om meisene prøvar å innbille seg og oss at det er nært foreståande med vårstrofene sine og fakter som ikkje er å misstyde.
Det går på solsikkefrøa og småfuglane er flittige gjestar på matstasjonen på varandaen. Kjøttmeisene er i fleirtal, men vi har også mange blåmeiser, granmeiser, 3-4 spettmeiser og svarttraster av og til er raudstrupen og eit dompappar innom og i går var ein grønnsisikhoe på besøk.

Eg hadde håpt på at regnet vi fekk denne veka skulle ta med seg det meste av snøen og renne til havs, men den gang ei!!! :(

Då lyt vi trøyste oss med andre gleder og i kjellaren under plantelyset har eg fått dei tre siste showauriklane mine i blomst og etterkvart som knoppane utvikla seg vart eg meir og meir spent på fargen - eg vart fort klar over at dei var av den attraktive "grønblomstra" sorten og heldigvis tre forskjellige!
Alle desse tre pluss dei tre eg viste i eit tidlegare innlegg er alle sjølvsådde av frå frå det franske frøfirmaet Barnhaven- eit frøfirma eg varmt kan anbefale til alle som likar Primula av alle slag.
Dei har godt utvalg både i Auriklar og andre Primula så det er vel verdt å ta turen innom deira sider på nettet.

Den raude kransen syns eg er lekker mot det grøne, kvite og gule. (klikkbare bilder)

Denne går meir over i raudfiolett, noko som viser betre på bildet under (same planten)


Den siste er mykje mørkare på farge, nesten over i det svarte og med god melering på blomst og stilk - utruleg lekker må eg seie!


Eg gled meg veldig til Hageauriklane ute i beda startar blostringa si, håpar det vert rikeleg blomstring denne våren, både på auriklar og dei andre Primulane når dei fyrst kjem igang.
Dei siste vintrane har eg hatt Primula i blomst stort sett heile vinteren, no er vi komne til midten av mars og snøen ligg djup over alt og gøymer alt det vakre som berre ligg å ventar på få utfolde seg. Tippar det vert litt av ein"eksplosjon" i fargar når fyrst snøen smeltar dei slepper til .

God helg til dåkke alle!

Uoffisiell snørekord

Drivhuset er snart nedsnøa, snart kan eg grave meg tunnell for å komme til dørene der.


Idag har vi virkelig fått påfyll av snø. No måler snødjupna på flat mark 93 cm og eg kan ikkje hugse å ha målt så stor snødjupne på dei 20 åra vi har hatt målestasjon for Det meterologiske Institutt. Hugsar vi eit år var oppe i "nokre og åtti cm" men hugsar ikkje i farten korkje år eller nøyaktig mål. (gidd heller ikkje finne fram alle notatbøkene og sjekke det ;-)
Enno meir sjelden er det at snøen har lege fast i 11 veker - snøen la seg den 19. desember og sidan har den lege utan opphald. Slikt er sjeldan kost her i fjordfylket.
No høyrer eg at det går ras mange stadar og mange vegar i fylket er stengt pga ras og fare for ras. I morgon varslar dei om meir snø før det på søndag skal gå over i synnjaveir og regn og når eg skal være ærleg syns eg det hadde vore godt no å bli kvitt snøen.

I dag fekk eg måka av drivhustaket og med den nedbøren som kom utover dagen er eg sikker på at det hadde vore ein ruinhaug no dersom eg ikkje hadde fått det gjort på føremiddagen.



Småfuglane stakkar har harde kår for tida, men her har dei matstasjon på verandaen der vi forar dei som best vi kan og kjøtmeis, blåmeis, granmeis, spettmeis, raudstrupe og svarttrast har vi der kvar dag . I dag eg var ute og måka snø høyrde eg jammen nokre av dei var begynnt å øve seg på vårstrofene sine, iallefall kjøtmeisa og spettmeisa var i vårstemning ei lita stund då sola nesten braut gjennom skydekket. Kort tid etterpå vart det plutseleg temmeleg mørkt og når eg sår rundt meg var eg omkransa av tjukke snøbyger på tre kantar og det skulle vise seg at dei ikkje gav seg før det leid på sein ettermiddag.

Spettmeisa



Morelltrea i vinterdrakt

I kjellaren er det no like før dei to siste showauriklane opnar blomstane sine og eg har ein mistanke om at dei har mykje grønt i seg, fargevariantar eg ikkje har noko imot å ha i mi eige.
Eg får komme attende med bilder når dei har sprotte ut.

God helg til alle som er innom ! :-)

JIPPI !!!

Det manglar ikkje på snø denne vinteren, men vi skal ikkje klage. Her er det ikkje meir enn ca 40 cm på bakken, mange andre stadar har dei mykje meir og får jamt påfyll.
No har vi hatt 11 dagar samanhengande utan nedbør men idag fekk vi ei lita lett snøbyge nett so mykje at vi vart påminna om at det ikkje er heilt tomt der oppe.
Mange stadar høyrer eg at dei er alvorleg redde for mangel på vatn etterkvart m.a. i Bergen og eg trur nok at held denne vinteren fram lenge KAN det bli realiteten andre stadar og. Grunnvasstanden på Vestlandet er visst betydeleg redusert las eg for litt sidan.
For ikkje å snakke om reservane i kraftmagasina - straumprisen er sjokkerande kva spotmarkedet angår og fastprisen er og på god fart oppover.
Men det finst håp...........


Under kjeglegrana min skjuler det seg eit håp om at under alt dette kvite er det aktivt liv tross i kulden.



Den fyrste snøklokka har begynt å vise farge og er eit kjærkomme vårteikn - det går på fram i år og.

Aurikkelblomstring i kjellaren

Ja det er langt mellom innlegga i denne bloggen for tida.
Helsesituasjonen er uforandra og denne veka har ikkje vore den beste i så måte, men det finst og gleder i kvardagen slik som aurikkelblomstringa i kjellaren.



No har to av dei Show-Auriklane som eg sette inn i kjellaren før jul komme i blomst.
Dei står under vekstlys i eit uoppvarma rom der einaste varmekjelda er er eit vekstlysarmatur og to djupfrysarar som gjev frå seg litt varme - nok til at det held seg på plussgrader uansett kor kaldt det vert ute. Og ute er det framleis vinter.

No har snøen lege konstant sidan 19. desember og det er det svært lang tid sidan vi har opplevd på våre kantar. Nett no har vi 42 cm snø "på flat mark " som det heiter ( her skal vi leite lenge for å finne FLAT mark!!!!)
Idag viser temperaturmålaren minus 6,5 grader som er nokså kaldt her hos oss, etter at vi har hatt ein periode med litt mindre kulde.


Fjellet som vi ser bak her heiter Troda eller Storetroda og er eit populært turmål både sommar og vinter. Det er nok flotte forhold å gå på ski til toppen av Troda denne vinteren for dei som er interessert i denslags. Personleg har eg aldri likt meg på ski.




Fleire Show-Auriklar er i knopp i kjellaren så eg håpar det vert fleire spennande opplevingar når dei opnar knoppane sine om eit par veker.

Ellers har eg meldt meg på ein import av auriklar og blåveis frå Tyskland ilag med andre blåveiselskarar på Nordic Hepatica forum
http://www.hepatica.org/phpBB3/index.php
Det vert vel den store invisteringa i hageplantar dette året reiknar eg med. Ellers får eg satse på å ta meg av alle dei frøplantane av stauder eg ikkje fekk prikle i sommar som var. Håpar dei fleste har overlevd vinteren og er klar for prikling til våren.

Sola har vi no hatt sidan 2. februar og i år har vi vore heldige å fått sett mykje til den også dei fyrste to vekene, ikkje kvart år det er så mange soltimar på denne tida.

Her ser vi dei fyrste solstrålane på den fyrste soldagen 2. februar 2010.

Eg ynskjer alle ei god helg!