Vårblomstring - tidleg vår til glede for dei fleste av oss

Det er å reikne som full vår her no og blomstringa er i full gang. Snøklokkene her blomstra sidan 23. januar og dei vanlege snøklokkene er etterkvart i ferd med å avslutte blomsterpryden, medan dei fylte snøklokkene som blomstrar lenger framleis står like fine som då eg tok dette bildet for 10 dagar sidan. I går såg eg den fyrste humla flaug frå blomst til blomst blandt krokusane og idag såg eg jamvel at den fyrste påskelilja viste farge, Svarttrasta har starta med morgonkonsertane sine og i dag tidleg høyrde eg tjelden for fyrste gong - Då er det vår!!

Blåveisane har alt blomstra ei heil stund. Her er det H. transsylvanica - Ungarsk blåveis som viser seg fram...

her er det H. transsylvanica 'Buis'

Denne skulle være H. nobilis marmorata, dvs skulle den ha marmorerte blad men ved feillevering frå produsenten veit eg ikkje kva sort det er - den har iallefall ikkje marmorerte blad, men uansett er iallefall blomane fine!

Den vanlege blåveisen Hepatica nobilis har rik blomstring kvar vår, denne varianten syns eg har ekstra små blomster.

Krokusane blomstrar flittig og er absolutt kjærkomne uansett farge







Her er det samla forskjellige fargar krokus i tillegg til snøklokker rundt sommarfuglbuska

Eranthis hiemalis er ein av dei tidlege vårblomstane og, men eg slit litt med å få dei til å trivast i hagen min av ukjent grunn.


Haquetia fekk eg som bytteplante for eit par år sidan og har planta den ved sida av ein Rhododendron. Liten plante som ikkje gjer så mykje av seg, men er kjærkommen når den blømer så tidleg som no.

Dette er skot av ein Sassaurea, men eg veit ikkje artsnamnet - også det ein bytteplante eg har hatt nokre år som får nokså store blad etter at den har blomstra frå seg. Heldigvis berga den knoppane då hjorten var der og forsynte seg med dei fyrste grøne skota som stakk opp tidlegare i vinter.

Så til slutt vil eg vise kva eg fant i hagen hin dagen då eg var ute og grov litt i hagen. Denne metallboksen med Niveakrem har lege i jorda iallefall meir enn 30 år, kansje over 40 år, frå tida før det vart tvungen renovasjon her i kommunen og det som ikkje kunne brennast vart gravd ned i hagen.......
Godt nedgravd som den var, har den bevart teksten som om den nettopp var blitt tømd og kasta. Det andre som var kasta og nedgravd i same hola var forvitra og bare restane igjen av og omdanna til produktiv jord og mineral.
- Eg er iallefall overtydd fabrikken har sine ord i behald når det gjeld teksten på boksen: " gir en pålitelig beskyttelse mot skadelige innflytelser...."

Blomstrande plantar på Nordåker pr. 1. mai 2010 - del 3

Mogop - Anemone vernalis veks vill i fjellheimen på kalkrik fjellgrunn. Hos meg trivst den godt i fjellhagen i grusblanda jord med mykje skjellsand innblanda. I år har den 10 blomster.


Blåveisane mine har fått hard medfart av veir og vind denne våren. Hagl, sludd, snø og regn har ført til at blomstrane har sett lite tiltalande ut til tider. Her er den fylte sorten 'Kyrvinberg'
som viser seg å være svært vanskelig å gjengje på foto med rett farge, men her er det beste bildet eg har fått av den i år.

Ungarsk blåveis - Hepatica transsilvanica her representert av sorten 'Weinreich Weize' Dei ungarske blåveisane er ikkje kalkelskande slik den vanlege blåveisen (H. nobilis) .


Den europeiske blåveisen Hepatica nobilis har blomstra ifrå seg for i år, der var mange blosmter på denne tua og humlene har nok gjort sitt i mellom regn- og snøbygene og no er frøproduksjonen i full gang.



Anemone vulgaris 'Alba' - Stor kubjølle finst i fleire fargevariantar - den kvite er fyrst ute her hos meg.


Anemone ranuncloides - Halvfylt gulveis har fuska litt ettersom den stod i potte i drivhuset i vinter og kom igang ein del før "normaltid" , men fin er den iallefall.

Kvitveis - Anemone nemorosa har eg mykje av i hagen min, både i bed og andre stader. Den vanlege viltvoksande er den tidlegaste, seinare føl andre sortar/variantar på.
I fjor fant ei gruppe med kvitveis der baksida av kronblada var grøne - ikkje så uvanleg det, men desse var nesten heilt grøne på baksida og eg tok med meg ein rotstokk. Idag planta eg den potta i eit bed, men rimeligvis er ikkje den blomstringsdyktig i år.

Påskedag 2010

Eg håpar at dette biletet av bygda sitt eige "påskegg" -Gullskora -vert det siste vinterbiletet denne sesongen!
Sjeldan å sjå fjorden så blank som ein spegel, men det var det den dagen (30.mars) då madammen tok dette biletet frå varandaen vår.

Påskeliljene rakk ikkje å bli ferdige til påska dette året, men om ikkje lenge har eg mange flotte gule tuer rund om i hagen.


I dag har eg vore ute og reinska litt i fjellhagen og bed, men det var ikkje så lange stunda før eg måtte gje meg og gå i hus att - energien er ikkje på topp nei, men eit innlegg i bloggen vart det jo i pausa..... så får eg sjå om det vert ei økt til seinare idag.
Har fått yngstedattera heim på besøk og ho skal være her eit par veker så eg får spørje pent om litt bistand så eg får gjort det grøvste før veksten kjem igang for alvor ! ;-)

Helleborus niger - den reint kvite julerosa er fullt utsprotten no. Vakker!

Blåveisane er også såvidt begynnt å sprette ut. Det ser ut til at alle har overlevd vinteren og det er kjekt ettersom eg i fjor skaffa meg fleire nye sortar både av den vi har viltvoksane her i landet Hepatica nobilis og ungarsk blåveis H. transsilvanica. Knoppane er klar under snøkåpa og så snart snøen er vekk foldar dei seg ut mot sola og lyset. - Vårteikn betre enn noko anna!

Her ser vi knoppar på Hepatica transsilvanica 'Weinreich Weize' - på biletet under er det også ein ungarsk blåveis H. transsilvanica 'Weinreich Blaue'


Her er det Hepatica nobilis marmorata - ein blåveis eg importerte frå Tyskland i fjor som skulle ha sølvmarmorerte blad, men det har den lite av så det spørs om ikkje det er ein feilmerka plante eg har fått!!!! - Iallefall er blomsterknoppane velfyllte og sprettande klar til å opne seg mot verda.

Krokusgruppene lyser mot meg mange stadar i hagen - dette trur eg er C. tomasianus som eg har grupper av fleire stadar.


Under sommarfuglbusken (Buddleja) har eg planta grupper av forskjellige krokusar som lyser opp. Her har småfuglane hatt mellomlanding med solsikkefrø i vinter så det ligg betydelege mengder med solsikkeskal på bakken. Litt beskjæring trengst og iløpet av våren.

Enkelte av Auriklane mine ute og har begynt å vise knopp. Eg gled meg til dei kjem i blomst, håpar at mange av dei sjølvsådde kjem i blomst i år med mange nye fargevariantar.

Kuleprimulane viser og knoppar og begynnande farge.


Tilslutt vil eg vise den flotte barken på snøklokkebuska mi - Halesia carolinae - det er ikkje bare "snøklokkeblomstane" på den busken som er tiltalande.

I går på påskeafta hadde vi eit strålande pent veir med sol og bra temperatur som lokka fram både den fyrste humla og den fyrste sommarfuglen dette året.
Kjekke vårteikn!
Idag er det overskya og søraust bris. Det ser ikkje ut til at det skal bli meir sol idag enn dei små og få glytta vi fekk i morgontimane, men det er bra temperatur så vi er fornøgde bare det er opphald.

Tilslutt vil eg ynskje alle ei fortsatt god påske!

Litt vårbilder til oppbygging

Blåveisen opna seg skikkelig idag då det var ei stund med solskin, er ikkje dette vår så veit ikkje eg !


No har vi hatt nokre flotte dagar med mildveir og opphald. I går var det ca 10 grader mykje av dagen men ein krafig austavind gjorde at det likevel var litt gufse. Idag har sola vore framme i periodar og det gjorde godt for sinn og skinn.
Våren er godt i gang og det blomstrar litt her og der i beda mine.
Både i går og idag har eg vore ute og knipsa litt her og der. Idag rakk eg heldigvis å knipse eit bilde av blåveisen på fyrste blomstringsdagen, men eg vart akkurat for sein å fange inn crocusane sin fyrste opne dag.
Idag er det den dagen då det meste som kan gå skeis går skeis. Iallefall var det slik på jobben, men heldigvis ikkje noko alvorleg bare slikt som er irriterande heft og møde.
Ein god blund på sofaen og ellers lite og inkje mellom dei to jobbperiodane får eg håpe gjorde susen så no er eg snart klar for dei to siste arbeidstimanepå jobben idag.


Crocus saturnus har eg på fleire plassar, syns dei er flotte !



Gule krokusar lyser godt opp i vårhagen


Denne krokusen trur eg heiter 'Blue Pearl', fargane vart litt blasse på bildet i forhold til slik dei er i virkeligheta.




Helleborus niger, kvit julerose blømer fint no.


Snøklokkene har blomstra lenge, i tillegg til dei vanlege G. nivalis har eg desse to
Galanthus nivalis flore plena og den andre sorten som er ukjend som eg skreiv om i forrige innlegg



Her er det nærbilde av Galanthus nivalis floreplena

På mandag sådde eg diverse som eg får omtale i eit anna innlegg.

Våren er i anmarsj

Ja no er det lenge sidan eg har oppdatert bloggen min. Forma har ikkje vore den beste sidan kulden tok meg for ei tid sidan og skrivekløa har ikkje vore påtrengande akkurat, eller rettare sagt heilt fråværande den siste tida.
Snøen har kjeme og reist att og i dag tidleg var det atter kvitt på bakken når eg stod opp, men den har reist att iløpet av dagen.
I mellomtida har eg kost meg med slektsforsking andre ting i fritida, jobben tek jo som kjent det meste av tida slik det skal vere.
På bordet ved sida av meg har eg hatt ein bukett med morellgreiner som eg har dreve i blomst.

I går var eg ei lita runde i hagen for å sjå om det var noko nytt som kom fram no når snøen hadde smelta, og der var det jammen sant litt av kvart men eg var der i skyminga rett før eg skulle gå på jobb om kvelden og for mørkt til å få skikkelige bileter så eg utsette det til idag og heldigvis forsvant det velse snødekket som kom i natt.
Her er litt av det eg fant i blomst :

Blåveistua mi viser blå knoppar alt, litt uklare og våte er dei i småregnet vi har idag.



P. elatior-hybrider (P x polyantha) har eg i fleire fargar, men denne syns eg er finaste av dei som blomstrar no.
Primula elatior ssp. Mayerii var også komme i blomst no

Galanthus nivalis flore plena heiter denne fylte snøklokka, idag var den ekstra pynta med regndropar.



Like ved sida står det ein anna sort snøklokke eg ikkje veit namnet på. Eg fekk den av ein hagevenn som ikkje visst kva sort det er. Skal komme med fleire bileter når den utviklar seg meir. Blomstrane er mindre enn den vanlege G. nivalis og er ein god del seinare.

Også tusenfryden er komme i blomst, men biletet var av ein slik kvalitet at den ikkje var presentabel. Ellers livnar mykje til i hagen no framover, og i peonbedet mitt er det spennande å sjå kor mange av dei som vaknar til live i år også.



Her er Peonen eg fekk frå Toveve for to år sidan. Overraskande mange skot som dukkar opp i år så det er tydeleg at det trivst i det opphøgde bedet eg laga til. Er eg riktig heldig kjem den i blomst til sommaren.

I dag kom Hagetidend i postkassa og det vert vel det eg har som sengelektyre til kvelden, men no fyrst er det ei ny runde på jobben.

Ha ein fin tysdagskveld alle saman.